韓國男團NCT 127今日喺澳門新濠影匯舉行《NCT 127 FAN MEETING in MACAU》粉絲見面會，見港迷前9位成員率先現身記者會。

NCT 127率先用廣東話「大家好，我哋係NCT 127」，之後又逐一自我介紹。提到首次喺澳門舉辦粉絲見面會，泰容表示：「今次係第二次嚟澳門，今次比上次更緊張、更激動。」被問到會唔會唱廣東話歌，在玹表示有刻意學廣東話及了解當地嘅文化，不過就賣關子冇講有冇準備特別舞台。

而道英及Johnny稱想去澳門塔玩笨豬跳，中國成員Win Win就表示想同成員坐渡輪睇夜景。被問到SM事務所嘅前輩創下唔少紀錄，Mark都指因為前輩嘅成績令佢哋發奮要都更加努力：「東方神起嘅U-KWON前輩畀得最多意見我哋。」對於用一樣物品形容自己，在玹笑稱因為自己於情人節生日，所以揀朱古力代表自己，至於隊長泰容就揀鋼筆：「因為鋼筆好有重量，就好似身為隊長嘅責任感咁。」

之後NCT 127就玩大爆料，泰容被指係成員中最愛整潔，Yuta就自誇自己係最照顧成員嘅人，並指：「大家喺宿舍住，會一齊打機、睇電視，好開心。」提到未來計劃，泰容表示會再去其他地方開騷，展現NCT 127嘅魅力。