一連兩埸《GIN LEE FIRST OF ALL演唱會》噚晚喺紅館完滿結束，嚟捧場嘉賓有校長譚詠麟、劉美君、鄭東漢、陳志雲、梁芷珊、盧冠廷、蔡一智、林欣彤同陳慧敏等。尾場繼續邀請好姊妹江海迦(AGA)擔任嘉賓合唱《一加一》，AGA指呢首歌令兩人走埋合作相處兩年，沿途見到Gin Lee一路付出好大努力，Gin Lee指AGA同樣一直努力，不經不覺更同公司幾年了。

在父親打鼓，姐夫彈bass伴奏下，Gin Lee跟媽咪及家姐合唱《給我一個吻》，當介紹家人時，Gin Lee指父親年青時係一位男神，邊打鼓邊唱歌吸引不少女仔慕名而來捧埸被迷倒，佢話:「我媽咪都唔簡單，佢有天使臉孔魔鬼身材，o依家係好幸福狀態，我媽咪依然好靚。」之後姊妹合唱一曲《我也不想這樣》獻給父母，唱畢後家姐多謝Gin Lee一直努力，令佢有機會踏上紅館，Gin Lee感動說:「係我應該多謝你，同埋父母教導得我同家姐好好，根基打得好，爸爸同爺爺教我哋要努力、努力，不怕辛苦。」

Encore時，Gin Lee唱出《Kong》介紹尾場特別嘉賓側田在台中升降台現身，之後側田在台上斜坡草坡小心翼翼滑落台邊會合Gin Lee。側田大讚現場氣氛熾熱，提議再合唱一段佢哋之前合唱過嘅《愛是永恆》，側田臨走前話：「喺妳做新人嗰一年識妳，見妳進步好多，好proud of you，恭喜妳。」Gin Lee感激當日收到邀請便二話不說答應，最後獻唱《今天終於一人回家》，落台前做出心型手勢及送上飛吻為兩埸演唱會寫上句號。

完騷後在後台訪問，Gin Lee指難得踏上紅館舞台，佢渴望跟家人分享這重要時刻，所以提出請家人同台演出，當提到媽咪在台上眼濕濕，佢坦言自己都感動，加上家人一直好擔心自己，所以現在有少少成績，好想畀佢哋見証。至於感情事，Gin Lee笑指家人畀好大空間佢，亦明白佢喺事業上想做多點成績先，所以唔會催她，身邊暫時冇任何追求者，佢透露演唱會後會請家人到泰國旅行，佢笑說:「我最想係食餐飽，因為餓咗好耐。」講到去泰國會大解放穿三點式，佢都覺得唔好浪費操咗三個月嘅好身材。但無意放上網派福利。今次苦練不少舞步，Gin Lee打算繼續練舞，因為排練期間愛上跳舞。至於會否巡迴演出，佢指正洽談當中，可能會先喺大陸舉行。

精選娛聞，喺晒《娛果》
http://fb.com/appledailyent