袁彌明一力經營嘅「彌明生活百貨」，近年越開越多，佢過億生意額仲籌備搞上市，佢不時親力親為構思短片宣傳產品，日前搵咗「大佬孝」邵仲衡拍片示範。

邵仲衡一向畀人粗獷感覺，佢自問唔貪靚，平日都係只做一般清潔皮膚，唔會刻意做護理。邵仲衡呢期留咗「二撇雞」，除咗添男人味，佢話係fashion。邵仲衡表示打理時幾麻煩，佢今日接受《蘋果》訪問時話：「我鍾意嗰種質感，但要唔介意要打理，食完嘢黐住，天氣熱會覺得少少污糟，又會睇落去老啲。不過男人留鬚係好睇啲，o依家留慣咗，如冇咗會有光光脫脫感覺呀。」

袁彌明日前幫邵仲衡親手護膚，邵仲衡初時有少少尷尬，但都樂意坐定定任舞，袁彌明就話：「我最初叫佢拍護膚嘢，佢又話呢樣唔整，嗰樣唔整，我咪迫佢試用吓防曬粉。」邵仲衡最後由抗拒到滿意。