李克勤入行30周年，下月3號喺紅館舉行演唱會，克勤今日上《蘋果》fb直播，俾大家睇佢個綵排，克勤即時介紹自己之餘，仲向大家介紹下BAND，克勤話平時音樂總監會喺現場黑面，不過今日總監唔喺現場，佢笑言可以free啲，一開始就唱《一生不變》，唱唱下，好友周慧敏出場。

克勤彈結他綵排第一首歌《一生不變》，一開頭就有啲甩漏，但佢笑話唔緊要，好嘅歌手喺綵排有錯漏，但正式演出就會冇事。唱到一大半，周慧敏出場，克勤話準時嘅歌手就冇幾個，好似一早已估到係邊個歌手!

咁周慧敏就問佢要排咗幾耐，點知原來克勤係估唔中，佢話之前《蘋果》講會有個搗蛋嘅人，估唔到係周慧敏喎，佢以為係梁榮忠，之後克勤問到周慧敏幾時開騷，周慧敏話明年開。

周慧敏又話克勤今次個唱做創作總監，克勤就話唔係，只係八卦，算係少參，克勤又話今次開騷只係開過一次大會，其他都冇理，克勤又指：「服裝咁，我交俾阿Wyman處理，佢話靚就靚，今晚會試衫，之前同Wyman去咗日本，Wyman就話有珠片嘅你之前都着過，所以今次會冇珠片，有啲會搵人造啦，有啲佢會搵。」

周慧敏坦言Wyman係天價喎！李克勤笑指搵到佢希望到時會有一個唔同嘅李克勤，Wyman係天價都請佢唔到。