李小龍、許冠傑同陳志雲，有咩關係？一個係武術奇才，一個係歌壇奇葩，一個食飯食到出晒名，三人睇嚟風馬牛不相及，但原來都係聖芳濟書院舊生。噚日係聖芳濟書院創校52周年，1,200位師生同家長早前籌咗45萬，噚日就由校長袁志輝做代表，將善款送交「聖芳濟書院基金」。咁，梗係順便提吓呢三位校友啦！
校長話，一位熱心校友早前講到明，如果學校籌到300萬，佢就捐同等金額，加埋基金原本仲有嘅400萬，就可以向1,000萬進發，𠵱家有45萬都算係一個好開始。校方冇講呢位校友係邊個，可能對方想低調啲啩。咁又係，做善事唔使出名，唔通迫人加自己個名落去，叫做xxx醫學院……sorry，講錯，應該係xxx聖芳濟書院咩？