近年轉戰大陸嘅劉愷威，佢同大陸藝人楊冪所生嘅囡囡「小糯米」，已經4歲大，目前都係由香港嘅爺爺、嫲嫲，即劉丹夫婦照顧，同囡囡聚少離多，噚日喺父親節，相信愷威嘅感受特別深，好似佢最近參加大陸歌唱節目《跨界歌王》時，就選咗一首《給寶寶的歌》送俾囡囡，觸動到好多大陸觀眾，但原來喺比賽嘅前，愷威喺幕後花絮入面，講到囡囡竟然當場流下男兒淚。

劉愷威參加《跨界歌王》後，好多人大讚佢唱歌好聽，其中一集，佢揀咗一首歌《給寶寶的歌》送俾囡囡，愷威話呢首歌對佢嚟講係一首好有意義嘅歌：「因為我一直喜歡這首歌，我經常會跟我女兒唱，我希望她以後長大了，長大了以後想起爸爸當年給她唱過這首歌。」當佢講完呢句話，愷威竟然摸摸後腦，跟住就忍住眼淚，沉默咗幾秒，然後就向工作人員攞紙巾印眼淚，稍稍平伏情緒，佢就話：「你一問我女兒的問題，我就受不了。」

而有網民就大讚愷威係一個「暖爸爸」，也有網友打趣「女兒結婚怎麼辦」、「可能想到女兒交男朋友了」。

精選娛聞，喺晒《娛果》
http://fb.com/appledailyent