今日佛誕假期，熱辣辣唔想逼入長洲睇飄色、搶包山，都有其他選擇。姊妹Michelle話，馬來西亞旅遊局今日起一連三日，喺將軍澳東港城舉行馬來西亞嘉年華，介紹當地地道嘅美食同民族技藝。咁又係嘅，港人旅遊熱點曼谷家亂到七彩，鄰近國家仲唔趁機出手搶暑期客咩。東瀛遊執行董事禤國全都話，家都唔少客轉到馬來西亞、台灣玩，大家團費都係差唔多。
Michelle話，馬來西亞其中出名嘅美食係TehTarik南洋拉茶，拉吓拉吓就拉出又香濃又幼滑嘅茶，今日下晝大會搵咗名模周汶錡同有少年食神之稱嘅Micheal，即場同觀眾大玩拉茶，同埋示範做馬國傳統手工藝月亮風箏（Waubulan），「風箏半月形狀而得名，當地人有BB出世，就會整個巨型風箏，用嚟辟邪。」

有馬國民族服裝睇

Michelle又話，聽日原籍馬來西亞嘅名模莊思敏同華裔小姐楊秀惠，會聯同多位模特兒行Catwalk，展示不同嘅馬國傳統民族服裝，包括彭亨州皇族服飾、顏色鮮艷嘅印度Lehenge、沙勞越民族服飾；星期日就搵咗名廚周中同藝人陳敏之等人嚟一場大馬版美女廚房，即席烹調馬來西亞地道美食炒棵條。吓，咁咪啱晒啲龍友嚟影相。
小妹最like係現場免費試飲試食，好似怡保白咖啡、炒飯、沙嗲串燒；仲可以玩當地古法紋身，係用草本植物Henna製成膏狀，畫喺手上嘅獨特圖案。查詢25285810。

電郵：mailto:[email protected]