擁有不一樣童年的譚凱倫，從BB開始就由一個婆婆照顧，一年才見一次父母，後來媽咪和這個婆婆有錢銀瓜葛，她才跟回媽咪。她說：「細個我唔明白，點解你係我有血緣關係嘅親生媽咪，要咁對我呢？其實人生頭半段係最需要家人，因為未識自立，好靠屋企人去愛，但我就缺乏咗，試過坐喺窗邊想跳樓，感覺係生不如死。」

回想在青年宿舍生活，Helen說：「入到去乜都要自己做，食飯夾餸慢啲都會冇晒，要學識保護自己，初初真係好唔慣，都會俾人整蠱，會唔見嘢，但我相信你對人好，人對你好，所以之後都OK。」
問Helen今日再次面對父母，會有何感覺？她表現淡然：「我原諒到佢哋，但我面對唔到佢哋！」她又提到早年曾與生母見面：「唔得就係唔得，𠵱家24歲，發夢都會發到俾佢打，咁就唔好強迫大家啦！」

Helen自言現在活得開心，即使現在只住在百多呎劏房，但有愛犬陪伴，有喜歡的工作，覺得比起很多人已經幸福。有指現在工作不及入行前穩定，她霸氣表示：「如果你要我窮啲做自己開心嘅嘢，定係有錢啲但自己返工唔開心，咁我寧願窮得瀟灑！」
撰文：鄉奈仁
攝影：葉君海
場地提供：銅鑼灣迷你酒店