韓國天團BIGBANG隊長G-DRAGON(GD)正進行個人世界巡迴演唱會「G-DRAGON 2017 WORLD TOUR ACT III, M.O.T.T.E」，前日起一連兩日於澳門開騷，8月25及26號更會唱到香港亞博館，而主辦方今日透過Facebook公佈更多香港場嘅消息。

GD今次港騷嘅門票有$588、$988、$1388、$1688、$1888及$2588共6種，當中$2588為VIP門票，可觀賞GD綵排及獲得獨家貴賓禮物包一份，亦可優先入場及於獨家售賣處購買GD演唱會嘅周邊商品，門票於本周五(23號)透過快達票公開發售。至於Citi Clear Card客戶及主辦方「Live Nation」嘅會員就可以率先買飛。

另外，GD早前嘅新碟專輯《權志龍》反傳統以USB形式推出，不過就被韓國音樂產業協會認為USB唔可以被視為音樂專輯，令GD呢隻專輯唔可以紀錄於韓國權威流行榜Gaon嘅專輯銷售榜單，同時亦都有機會影響到GD新歌喺各大電視台、電台嘅排名，因為SBS同MBC都以Gaon排名做基準，而GD亦曾因為呢件事喺Instagram爆seed。

而今日Gaon方面就《權志龍》USB專輯嘅事發表立場：「Gaon所規定嘅『專輯』定義只包含實體CD，唔包括數字化音源(即USB)，所以今次《權志龍》不被Gaon列為『專輯』，如果將USB亦包括再內，會影響到Gaon數字榜、下載榜、專輯榜。雖然Gaon應該緊跟上新媒體嘅發展，但今次決定係根據Gaon專輯榜已有規定進行嘅政策判斷。」

及後GD所屬嘅YG事務所表示會尊重Gaon嘅立場，但亦感到遺憾：「如果依據Gaon專輯榜所主張嘅因為《權志龍》冇將音樂直接放喺USB，導致不能進行統計嘅意見，咁專輯榜嘅統計亦應該只包含下載量，而唔係將網上收看量都包含在內。」