I.T（999）剛公佈全年業績，純利僅倒退27%至2.8億銀，較上半年喪插近八成明顯改善，毛利率及存貨周轉天數全部好轉，令包括唐牛在內嘅市場人士大跌眼鏡。業績縱然回落，派息竟反高潮大增逾兩倍，成為上周五報復性反彈嘅催化劑。但要留意，主席沈嘉偉被問到點睇未來零售市道，都唔夠膽講走出谷底，先要扣分。另外，毛利率回升全因減價清貨所致，所謂改善亦要打折扣。
派息大增更令人摸不着頭腦，但睇番公司股權結構，大股東沈嘉偉家族持股達57%，今次共可收息逾7,000萬銀，出手闊綽嘅原因呼之欲出。說到底，所謂利好消息全部好睇唔好食，戰友們坐順風車時，記住見好就收。

細細粒可塑性高

近期國策股有回勇迹象，當中又以燃氣股來得最實在，經過十多年談判，中俄近日終簽訂30年長期供氣協議，涉資3萬億銀，華潤燃氣（1193）、中國燃氣（384）、新奧能源（2688）、港華燃氣（1083）全線落鑊，但隻隻過百億市值，只能揸長線慢慢享受升幅；追求單日大大棍嘅戰友，不妨考慮中國威力（6828）。中國威力原本提供印刷服務，近期轉攻天然氣供應業務，並於山東、江蘇及遼寧三省簽訂買賣協議，強功液化天氣然及壓縮天然氣。公司最大賣點在於細細粒，最新市值僅8億銀，僅及其他龍頭嘅尾數，可塑性甚高；公司即將改名為藍天威力，轉型決心不言而喻，近日由高位回落，隨時係最後上車機會，戰友請好好把握。

唐牛