鍾意咗利物浦都好多年，小記終於第一次去到晏菲路睇波，心情係興奮的。不過，可能期望太高，對於場內氣氛係有少少失望。

小記嘅座位喺主看台最接近客隊球迷區嘅位，同紅軍最熱情嘅KOP看台距離好遠。基本上全場聽得最多，係米杜士堡球迷打氣聲，附近利迷大部份都好冷靜。第一次入晏菲路睇波，係有啲high high哋，亦都唔甘心靜靜哋睇波，所以試吓自己開始嗌「We love you Liverpool! We do!」等口號，可能真係遊客多，少local啦，完全冇人理。面對住米堡球迷，嗰刻心入面諗起東方主場對廣州恒大嘅球迷...... 咁當然嗰種對比冇咁極端啦。重申一次，氣氛係比想像中差，但仍然係好正嘅。

講起米堡球迷，小記之前都喺YouTube睇過片，唔少球會嘅球迷都會自嘲，唱啲歌寸自己愛隊，今次喺現場聽到真係笑咗出嚟，好似「We are going down, we are going down」（我哋降班喇）同「We lose every week, we lose every week, nothing is special, we lose every week」（我哋個個星期都輸，冇乜等別）等等，好有幽默感。雖然佢哋寸自己愛隊，但仍然不離不棄，呢啲就係真球迷。

今場波咁關鍵，其實都有啲擔心自己做黑腳，特別係賽前睇到網上有利迷話我哋《蘋果》燈力勁，去晏菲路邪住晒。好彩韋拿杜姆完半場前開到紀錄，當「領先一球永遠都好危險時」，古天奴亦入多粒，先至定返啲咋，最後都見證到紅軍重拾歐聯參賽資格！（其實仲有外圍賽一關要過......）

今季最後一場比賽，賽後例牌開party，盧卡斯第一個出嚟，喺「King」杜格利殊手上接過服務10年嘅紀念品，盛傳佢今季後會離隊，希望唔係真㗎啦。

記者禤家民利物浦直擊