今年由於公司業務不斷擴展，敏妮「有幸」參與其中，「不幸」係唔使旨意放大假旅行，所以Mr.B話去英國睇波，敏妮只係得個「恨」字。講開睇波，敏妮咁啱今年初停用攞到世界盃轉播權嘅有線電視服務，即係冇得安坐家中睇好波。好彩敏妮唔算超級球迷，可以好容易解決，有重要賽事先出街睇。不過，對於之前因為要睇英超而轉用咗NOW嘅朋友嚟講，就難選擇。
其實家陣好多朋友都慣咗上網睇波，更有朋友將電腦接駁到大電視螢幕。除咗上網睇，朋友知敏妮用iPhone，所以介紹咗個睇到世界盃嘅app畀敏妮，有慳錢好嘢當然要公開。據朋友講除咗iPhone，Android手機都得，只要安裝一個名叫「w.tv」嘅app，呢個app係免費嘅，裝咗之後就可以睇大陸多個電視台嘅節目，當中包括CCTV5。朋友話CCTV5有得播世界盃，所以敏妮可以用手機睇世界盃喇！

收費電視競爭者眾多

朋友仲示範用手機透過呢個app睇歐聯直播，始終網上直播質素如何，好睇個網絡質素，據朋友建議，用WiFi質素會好啲。
敏妮就試過用番手機網絡，download咗好耐都未load到，好彩敏妮屋企上網已經用WiFi。
足球盛事播映權，每每都係收費電視台刺激上客量嘅皇牌，但收費電視台嘅合約，一直都俾人話限制多，簽約容易終止難。
相反家陣網絡覆蓋，同傳輸越嚟越穩定，換言之，收費電視台面對嘅競爭，唔止係其他電視台對手。作為觀眾，當然係好事，因為有得揀，但對投資者嚟講，投資時呢個因素似乎唔應該忽略。
溫敏妮
http://wanmanli.com/blogs/