【韓流】太陽下月亞博騷最貴$1,888 iKON粉絲揚言罷買YG商品
太陽IKON楊賢碩
韓國天團BIGBANG嘅G-DRAGON(GD)下周五及六喺亞博館開騷,隊友太陽就會緊接GD,喺下月24號來港喺亞博館Hall 10開個人巡唱《TAEYANG 2017 WORLD TOUR [WHITE NIGHT]》。今日主辦方就公佈票價,並分別為$688、$888、$1,388及$1,888四種(全部坐位)。
門票將於下周五公開發售,而指定信用於客戶就可於下周二四優先訂購。當中購買$1,888及$1,388門票嘅觀眾只要加400港元,就有機會換取限量VIP貴賓証一張,到時有機會於演唱會當日入塲欣賞演唱會綵排。太陽為咗照顧港迷,亦特別製作香港站嘅演唱會海報,並會將於聽日首度曝光。
另外,與BIGBANG同公司嘅師弟男團iKON,佢哋嘅粉絲因為唔滿意YG唔多把資源放喺iKON身上,iKON嘅韓國粉絲團就公開表示將會罷買YG商品,當中iKON粉絲團準備咗一份長達18頁紙畀YG社長,指iKON由前年出道至今一直受到唔公平嘅待遇,公司又唔考慮成員嘅健康,而且只專注海外活動,韓國活動少之又少。
而最令粉絲唔滿意係YG老闆楊賢碩上月底就通過網上發言,似是回應粉絲訴求,但當中竟將iKON寫成「IKON」,大細草搞錯,令粉絲更加不滿,故此決定採取罷買行動。
對於粉絲團行動,YG方面就指iKON今年5月先推出專輯,0依家亦準備緊新嘅專輯,亦都會計劃同韓國粉絲見面,覺得今次只係誤會。