當年今日
關於我們

平田村近百戶排污渠滲漏

蘋果日報 2004/05/26 00:00


落成僅八年的藍田公屋平田邨第一期共有三座,當中有近一百戶細單位;於一年前開始,排污渠嚴重生銹,不時有污水滲出,有礙衞生。但房署只安排其中約三十戶更換排污渠,其餘只在渠身髹油了事,治標不治本。有觀塘區議員批評,房署選擇性安排換渠管,標準不清晰,且沒具體的時間表,令居民無所適從。
蘋果讀者陳伯稱,平日他經常前往探望其居於平田邨平信樓一細單位的友人譚婆婆。他表示,自年前開始,發現婆婆廁所排糞渠生銹,滲出污水,而於晚上七、八時間,更有濃烈臭味從排污渠傳出,需關上廁所門避臭。

只髹油治標不治本
他稱,「婆婆身體好差,字又唔識多個,我同佢咁多年朋友咪幫佢向屋邨辦事處投訴囉,但點諗到件事搞咗成年,房署次次都只係搵人喺渠身髹白油就算!咁樣治標唔治本,幾個月後又生銹過,淨係髹油都髹咗七、八次咁多。而且啲臭水係咁滲出來,點喺間屋住喎,咁唔衞生!」
他見事件未有進展,遂轉向區議員投訴,此時他才得悉邨內尚有不少長者居住的細單位,均出現污水渠生銹,有污水滲出,當中有部份單位已獲房署安排換渠。「咁即係唔係個別事件啦,但點解婆婆間屋條渠咁嚴重都冇得換?」
發出臭味令人作嘔
記者曾前往了解情況,見排污渠設於廁所馬桶旁,渠身嚴重生銹,滴出污水。當時雖只是午間時分,但記者入內拍照期間,亦嗅到排污渠傳出陣陣糞臭味,令人作嘔。
房屋署新聞組發言人表示,平田邨於九六年落成,屬舊式設計,排污渠設於室內。發言人強調,排污渠設於室內與滲漏未必有關,反而設於室內有利保養和維修,住戶亦容易察覺出現問題。至於何以有住戶的排污渠出現滲漏,以及安排換渠的進度等,發言人指仍調查中,暫未有任何回覆。 (○五一八○四二)

意見:更換渠管始治本
觀塘區區議員陳昌表示,平田邨第一期只有三座,分別為平信樓、平仁樓和平旺樓。每座每層均有四個細單位,多是獨居長者居住。邨內只有細單位使用生鐵製排污渠,裝設於廁所內。
他稱,約於一年前開始,陸續有居民投訴排污渠滲出臭水,渠身生銹,至今已累積達百個投訴,居民要求更換排污渠,但迄今僅有約三十戶獲安排換渠。「佢哋啲標準都唔清晰,又冇具體嘅時間表,令到居民好無所適從。好似譚婆婆咁,佢都算係嚴重嗰批,但等到𠵱家都未有得換!」

服務熱線
電話:29908288
傳真:23702192
電郵:[email protected]