文化大血拼一年一度書展又開鑼，貿發局今年要淨化書展，禁止o靚模開簽名會，不過寫真集照賣，睇錢份上，貿發局都見錢開眼。
書展有成百萬人次入場，好多政治人物都趕出書，把握機會搶收視，泛民三大黨因公投漸行漸遠，內訌殺到入書展，三黨主席分別推出新書，同場廝殺。

何俊仁新書未提及談判

近期人氣急升嘅民主黨主席何俊仁新書名為《謙卑的奮鬥》，自述搞社運、從政40年經歷。仁哥話唔會辦簽名會，星期日會在會展舉行講座，同市民分享行社運路幾十年感受。八方問佢有冇信心新書銷情受惠於民望彈升，仁哥笑言唔敢奢望，「冇諗過呢個問題，希望呢版書賣得晒就好」。
好多人想知民主黨同北京談判秘辛，八方提醒大家，呢本書冇包括政改內容，仁哥話有機會再版先考慮加入，如果想睇爆料，要耐心等等，或者忍一忍。
另一個黨主席社民連陶君行都趕製新書，據講佢前幾日先完稿，最快周末先印好送到書展會場。新書名為《抗戰二十年》，由佢讀大專時參加六四集會、學聯講起，到從政、組黨，可以話係香港少壯派政客政治生命大盤點，新書強調「李柱銘推薦」，據知有大班鄭經翰寫序，黨主席夫人孔令瑜寫後記。

陶君行封面似補習天王

八方睇過《抗戰二十年》封面，阿陶着西裝打呔十分正經，有人指佢造型勁似補習天王，冇乜「抗戰」feel，建議佢用示威抗議相片做封面更貼題，阿陶稱會考慮，不排除加印特別版。佢同何俊仁都選擇星期日到會展見讀者，屆時邊本書好賣啲呢？民主黨fans多錢，抑或社民連紅衫軍捨得，終於可以一決高下。
公民黨主席關信基亦有新書《醍醐灌頂》推出，關教授由創黨至今，每月寫一封「主席家書」，新書係家書結集，對一般讀者而言，恐怕吸引力一般，關教授下個月初會舉行新書發佈會兼對談會，同新一代社運中堅陳景輝、黎敬輝講青年參政。

mailto:[email protected]