當年今日
關於我們

撐香港非主流短片 睇《新浪漫-WiFi》《尋人啟事》尋啟示︱果燃上架

蘋果日報 2021/06/21 00:00

果燃台編輯推介伍嘉良伍奇偉

厲害了!商經局早前以迅雷不及掩耳的速度忽然修例,將《港區國安法》列入電影審查指引,同日即有短片被禁,就連立法會體育、演藝、文化及出版界議員馬逢國都話事前毫不知情。電影係一個時代嘅寫照,亦係極為重要嘅政治宣傳工具,商經局這一招不諮詢,不洽談,不商討,真係不得了!撇開所謂嘅創作自由唔講,可算係為保衛國家安危立下奇功。
對於電檢修例,影帝黃秋生話:「回應都怕犯國安法!」筆者深表認同,這個系列本叫「香港獨立短片選」,現將之改為「香港非主流短片選」,以避「獨立」之嫌。
empty
今個星期果燃台為大家揀選咗兩齣獨立製作嘅本土非主流短片,分別係張天耀嘅 《新浪漫-WiFi》同朱家誠嘅《尋人啟事》。

《新浪漫-WiFi》(12分鐘)

監製:伍嘉良
導演:張天耀
empty
阿「Gay」(梁進龍飾演)同「消失豐乳中」(管鋈飾演),一次絕不華麗嘅邂逅。
深夜裏,寧靜嘅太子小街,傳來幾聲槍響。
「有人射緊我呀!」
「過嚟啦,快啲啦!仲企喺度!」
唔好誤會,打緊手機啫,假如有一日,你屋企斷網,手機數據又唔夠用,你會做乜?
empty
洗衣店老闆(黃興國飾演)搵唔到WiFi密碼,向阿仔求救。
今日阿「Gay」(梁進龍飾演)同「消失豐乳中」(管鋈飾演)屋企齊齊斷網,不約而同嚟到同⼀間⾃助洗衣店借WiFi、玩同⼀個手機遊戲。WiFi先到先霸,梗係第一時間收埋個password一人尊享最爽啦,但係遇上同路人時,你又分唔分享?
empty
兩個毒男,一次絕不華麗嘅邂逅,喺洗衣店譜出咗今時今日嘅少年新浪漫。

《尋人啟事》(16分鐘)

監製:伍奇偉
導演:朱家誠
empty
「銘記」小食店嘅告示板。
活於大時代當中,有人失落,有人失蹤,呢間「銘記」小食店有個告示板,老闆Jason(盧鎮業飾演)同阿樺(陳曾寧飾演),會幫你張貼尋人啟事。
啟事一,失蹤者叫阿妹(易健兒飾演),係街坊芬姨個女,阿妹被爸爸鬧咗幾句,離家出走天光都未返。
empty
啟事一,失蹤者阿妹(易健兒飾演),同阿樺傾訴完後,好安心咁瞓着咗。
後來阿樺喺公園搵到阿妹,阿妹向阿樺傾訴,學校入面嘅某老師,以防止學生犯法為由,好仔細好慢咁「搜查」咗佢嘅身體,阿爸話佢抵死,唔犯規就唔會俾人搞。阿妹傾訴咗,阿樺聆聽咗,事件似乎就此平息,然而係咪就代表問題解已經解決咗呢?
啟事二, 失蹤者叫岳少君,囝囝阿傑(古俊軒飾演)移民在即,好想搵返失蹤嘅爸爸。
傑仔:「我同媽咪下星期就去加拿大喇,搵唔到就以後都搵唔到㗎喇。」
Jason:「有時搵唔到一個人,唔代表佢唔幸福㗎。」
empty
老闆Jason(盧鎮業飾演)張貼失蹤者岳少君嘅尋人啟事。
喺嗰一個多事之秋,人人都被捲入時代洪流,有人失落,有人失蹤;有啲人搵得返,但已經身陷囹圄;有啲人搵返嘅時候,已經不在人世。每個失蹤嘅人,總有佢失蹤嘅原因,岳少君失蹤嘅原因,係媽媽(岑君宜飾演)唔能講畀傑仔聽嘅一個秘密。
傑仔媽媽:「喺香港生活太困難喇,喺咁嘅環境之下成長,傑仔大個咗會同佢爸爸一樣。」
empty
活喺大時代當中,無論選擇去或留,都總有一個理由,作為一個擁抱自由主義嘅人,我相信人人都應該有選擇嘅權利。離開嘅人,希望你銘記呢個你曾經生活過嘅城市。留低嘅人,希望我哋能夠堅持,我相信只要堅持,香港電影總能夠喺狹縫中,搵到一片生存嘅天地。
「香港非主流短片選」推介,《新浪漫-WiFi》、《尋人啟事》,兩齣精彩短片果燃台現已上架,無區域限制供蘋果讀者免費觀看。

果燃台 | 果迷專屬嘅影片世界

-----------------------------
蘋果App大升級 更簡潔更就手!了解更多立即下載體驗