剛剛星期日跑完馬，二代目走咗去文華扒房嘆咗支89年HautBrion之後，就落咗去中環蒲場Magnum，一入到間場最靚嘅幾個女都要黐埋嚟同我呢個型佬飲酒，最後連呢間場嘅老闆，有中環靚女鬼見愁之稱嘅Rocky哥，都行埋嚟握住我手，話佢有錢有面，就算行埋去啲靚女身邊，都未必保證到啲靚女會賞面同佢飲杯喎，仲話二代目嘅溝女紀錄，五十年內都冇蒲友可以打破。
如果大家以為我認屎認屁嘅話，咁絕對可以當二代目喺度發噏風，但某馬評家最近喺報紙上自吹自擂，應該會有好多讀者想作嘔，唔明點解面皮成尺厚；話說該馬評家兼馬主大聲疾呼，佢老哥喺日前墨爾本費明頓春季嘉年華四日賽期，日日都有馬參賽，威水到連穆罕默德酋長嘅伙計都要埋去同佢握手，仲話酋長咁大團隊，都未必保證日日有馬上陣，馬評家話未來五十年，都好難有馬主會打破佢嘅紀錄喎。
哈哈，原來只係四日都有份跑咋，吹到天花亂墜，仲以為跑四日贏足四日，照咁講，曾經三奪墨爾本盃嘅「戴花」馬主，應該行出嚟同全人類講，喺世界末日前，都冇人可以打破佢嘅紀錄。二代目曾幾何時，都聽該馬評家講馬，直至有次跑安田紀念賽，佢賽前不停講「勝利飛駒」全場最高質素，但當過終點後佢竟然講，「大和主將」始終係全場最高質素嘅馬，真係問你死未呀？