五年抱兩就易,但要抽到時間湊女就難,以B女𠵱家嘅年齡,係需要瞓晏覺,唔知係陳師奶係因為夜晚多party,抑或私務繁忙,所以多數喺下晝至帶女出街。早排佢至抱B女蒲謝霆鋒中環band房,日前佢又喺下晝4點幾出擊,帶埋囡囡同菲傭去中環ifc商場嘅isola餐廳歎茶。
平日瞓到日上三竿先起身嘅徐濠縈當日叉足電出街,但B女捱到傍晚6點已經頂唔順,坐埋一邊放蚊,眼皮垂晒落嚟。徐濠縈見個女攰成咁,至嗌菲傭先湊個女返屋企,鬼咁眼瞓嘅康堤仲發脾氣扭抱㖭,結果個菲傭就一手拎住大袋重物,一手抱起B女出商場打的。
無女一身free嘅徐濠縈繼續留喺餐廳,原來佢係約咗馮德倫撐枱腳,短敍一粒鐘後至各自走。