有「電訊魔童」之稱嘅城市電訊創辦人兼主席王維基，喺08年上任亞視CEO後原本話要搞個翻天覆地嘅改革，點知佢只係上任咗12日就退下火線。不過呢小小衝擊又點會打沉魔童嘅決心，日前王維基高調宣佈，喺未來10年將進軍娛樂事業，仲會豪掟6億喺無綫隔籬發展多媒體創作中心。
聽講個創作中心同王維基申請緊嘅免費電視牌照有一定關係，佢仲會製作自家電視，馮仁昭聽聞魔童親自向無綫嘅金牌監製招手，實行以銀彈力邀過檔，當中包括金牌監製李添勝、《學警》系列嘅黃偉聲、《烈火》系列嘅王心慰，仲有梅小青同劉家豪都係佢嘅招攬對象。

添哥認有見面

馮仁昭日前向添哥李添勝求證呢件事，佢聽完咿咿哦哦一輪先話：「冇嘢喎，佢有託朋友搵我見過面，食過一次飯就冇再見喇！」問王維基係咪斟佢過檔？添哥話：「佢搵我梗係做嘢喇，但我推咗佢喇，我仲有年幾約，約滿嗰陣都65歲，會退休唔做。」係咪銀彈攻勢打動唔到添哥？佢話：「唔關事，唔係人哋出唔起錢，只係自己冇本事攞啫。」