金銅鐵鋼呢轉全部辣起，場內中信大錳（1091）啱啱創咗上市新低無耐，等炒落後跟彈。
中信大錳係全國最大嘅錳生產商，而錳係生產鋼材嘅主要原料。呢期見商品資源大挾，包括中信大錳有涉及到嘅硅錳，由上年10月尾近3,000蚊人仔，4個月累升咗70%，到家陣超過5,000蚊人仔。
又內地啱啱公佈，2月鋼鐵PMI係49，比上月升2.3個百分點，而新定單指數上番50樓上。
睇到係，連埋硅錳在內，一樣挾到飛起，而錳嘅下家鋼材瓣數，就有少少回暖。實體商品價一支箭，場內相關嘅，好似江西銅（358），由2月低位到家陣升咗近30%；鞍鋼（347）升36%，招金（1818）更加翻過半番。
中信大錳又點？單計由上年中1.69元高位，到上個月12號上市新低0.32元，都累跌咗81%，集團現價0.42元仲係超殘價，商品股齊齊挾，中信大錳已經有向上彈一轉嘅短線理由。