現年24歲嘅文青女神袁澧林（Angela），自喻喺人生最低潮時期，獲邀參演杜可風及白海執導嘅電影《白色女孩》，更擔任女主角，配上日本型男小田切讓，令到佢原先失去嘅信心一次過番晒嚟，Angela同胡子彤日前一齊於柴灣接受訪問，大談二人合作大計。

曾演出《那一年，17》嘅袁澧林，首次獲邀擔任女主角，自言有不可思義嘅感覺：「因為攝影師係一個大師，試鏡嘅嗰段時間，我經常質疑自己嘅能力，齣戲喺我最低潮時接到，導演決定用我，之後再帶我同杜可風見面，佢哋俾好多信心我，話我係完美，我屬於不斷質疑自己嘅人，佢哋當時俾信心我係好重要。」Angela指今次演出好有難度，鏡頭要講很多故事，電影語言運用高，一幅畫都有其背後意義，而作為演員，要配合，唯有邊拍邊學，Angela話：「今次拍攝好大發揮空間，會預先到場排戲，兩個導演對我哋嘅選擇好有信心。」

可以同日本型男小田切讓合作，Angela覺得有啲不可思義：「我演戲經驗唔多，我讀書時睇過一啲藝術電影，都係杜可風拍，有機會同佢合作，自己有啲緊張，試造型時首次同小田見面，初次見面佢個人表現幾cool，對戲時同我有溝通，俾我有好安心感覺。」Angela描述戲中兩人喺故事中嘅小漁村，搵自己嘅歸屬及愛情，Angela話：「有一場戲，我哋喺廢墟互訴心聲故事，佢同我對戲時，俾到好大信心我，願意同我溝通。開頭見到好緊張，冇乜講嘢。」

Angela於電影中係個唔可以曬太陽嘅女仔，生活受盡壓抑，少有性感造型嘅袁澧林，喺戲中身穿單薄睡衣四圍遊，佢話：「愈係壓抑就愈想俾人睇，過度保護其實係傷害緊一個人，衣着對我來講係咁，爸爸愈想我遮住，我愈想睇吓自己嘅身體，我着住媽咪俾我嘅睡衣，覺得自己好性感，想俾一個唔歧視我嘅人睇到。」

初演女主角，袁澧林唔太滿意自己嘅表現：「其實自己一定睇到好多沙石，對比起小田，我自己唔單止係唔穩陣，其實好多嘢未成熟，如果可以再來一定可以仲好。」胡子彤笑指袁澧林擔心自己演技係多餘，皆因一切都已經返唔到轉頭，唯有等下一齣戲更加努力，胡子彤話：「我認為同《點五步》係有啲唔同，我反而唔會着眼自己做咗啲乜，反而着眼之後應該做啲乜，每次睇完覺得有啲位唔好，睇吓下一部點樣去改善，做運動員、演員都好，呢點都十分重要。」

胡子彤於戲中飾演一名小惡霸，佢話角色相對上易處理，於戲中對袁澧林由對頭人，演變成愛慕，胡子彤笑言：「可以同靚女合作梗係開心，最估唔到可以同小田切讓合作，一個好清楚自己做乜嘅巨星，同我哋喺大排檔食飯傾偈，好感覺到一個明星係點。」胡子彤同袁澧林，期望可以一齊拍有關運動嘅電影，袁澧林話：「第一時間諗到嘅就係運動戲，之前傳聞電視台計劃開一個節目係打排球，聽到都開心。」胡子彤話：「我哋新人要不斷磨練，我唔介意做惡人角色，將來想試吓演己大反差o既角色，情深或喜劇。」

袁澧林
服裝：Channel

胡子彤
髮型：Lupus Chui@Orient4
化妝：Bonbon@MOD Makeup Academy
服裝：agnes b.

更多娛聞，喺晒《娛果》
http://fb.com/appledailyent