韓國人氣綜藝節目《RunningMan》（RM）嘅五位主持人宋智孝、李光洙、金鐘國、HaHa及池石鎮前日拉大隊印尼，準備噚晚舉行嘅粉絲見面會，佢哋前日先係印尼舉行記者會，雖然宋智孝嘅「周一情侶」拍檔Gary因為工作嘅行程而冇出席，但無損智孝BB嘅心情，前日智孝BB落機後就立即換上長袖碎花連身裙，化咗韓星必備嘅鮮艷紅唇妝，索爆現身見當地傳媒，智孝BB係現場仲同其他主持人有講有笑，心情勁靚。

噚晚佢哋同印尼粉絲愉快地度過兩小時，除咗同粉絲玩唔同嘅互動遊戲外，五位主持人更係台上勁歌熱舞，落力演出令粉絲非常感動。

《RM》一眾主持人完成印尼的見面會後，下月1日就會移師去馬來西亞嘅吉隆坡搞見面會。原本李光洙因個人工作行程而要缺席活動，但日前佢就宣佈會隨大隊前往吉隆坡。而出名好兄弟的金鐘國及HaHa，亦將於12月孖住到美國紐約開騷。今次係二人繼7月時係美國加州開騷後，再去美國出席活動，演唱會嘅門票下月開售。

另外，有網民將劉在石、李光洙和金鐘國嘅照片進行改圖，搞到佢哋無拉拉變性做女人，把佢哋個樣分別key係着住HelloKitty睡衣及性感內衣嘅女模特兒身上，當中以李光洙嘟嘴、右手食指放在唇邊、左手拿着HelloKitty公仔嘅造型最為搶鏡。未知網民係唔係怕「能力者」金鐘國嘅脾氣，所以就好錫佢只係畀佢簡單着住HelloKitty睡衣。而劉在石擘大口笑嘅樣就配上豹紋內褲嘅造型，性感之餘亦非常搞笑。