當年今日
關於我們

  曾一哥懷念官邸花園 - 李八方

蘋果日報 2004/01/23 00:00


猴年新開始,啲官員又有啲乜嘢新去向呢?好多人問八方,剛卸任警務處處長嘅曾蔭培會有乜搞作。
咁啱八方最近去中環,行行吓見到一個好熟識嘅面孔,望真啲,原來就係曾一哥。佢西裝骨骨,滿面笑容,鬼咁輕鬆行過,八方梗係趁呢個大好機會,面對面問清楚佢有乜新動向啦!問到係咪會去新世界幫鄭裕彤手?老董同王永平批咗未?點知佢即刻猛咁耍手擰頭話未定未定。
聽聞曾一哥退休之後,已經搬離官邸,返番去碧瑤灣老家住,唔知係咪因為以前間官邸有花園草地,𠵱家如果冇就唔係好慣,一哥話想搵過間新屋,最好就喺碧瑤灣搵到啲地下連花園嘅單位。

最重要樓價升
早前,小小超喺一哥間豪宅前面起數碼港,搞到碧瑤灣啲業主好唔開心,開過幾次大會反對,話影響佢哋嘅無敵海景。不過,𠵱家起好咗之後,又覺得唔係咁差,沙塵同噪音都比想像中少,所以都冇乜所謂。咁當然,最重要係啲樓價升番啦!
(圖〉曾一哥雖然話未定新動向,但就先放聲氣話想搵過個連花園嘅新屋。 資料圖片



傳真︰2623-9278
電郵︰[email protected]