經營「時間廊」的寶光（084），上市超過40年，但有一大段時間好似潛咗水咁，冇晒聲氣，連投資者關係部門都冇，舊年先成立番。估唔到公司最近竟然成功引入咗私募基金博裕（Boyu），認購3.7億可換股債券（CB）。呢個基金來頭不少，江澤民長孫江志成有份打骰，李嘉誠基金有份投資。聞說博裕班底，是一班曾任職高盛的賓架，而領導人就係曾在TPG中國工作過兩年的馬雪征。

博裕呢個名一出，咩都未做，寶光已經爆升，升穿咗CB換股價1.95元超過三成。私募基金的光環，令投資者憧憬公司可以由灰姑娘變公主，但呢種迷思其實並不可靠。私募基金入股上市公司，表現可以係非常參差，例如國美（493），股東不合作的因素，可以話係貝恩（Bain）始料不及；至於李寧（2331），到底TPG點可以接受大股東大玩財技，將股份注入另一間殼公司？海迪不禁懷疑是有人睇漏眼。
有私募基金界人士指近年錢太多，業界急住投資，好deal難求，「落叠」前盡職審查不如以往詳盡。海迪覺得寶光是務實公司，但會否烏鴉變鳳凰仲有唔少風險。如果唔係，博裕認購的就係股份，而唔係可換可唔換的CB了。

海迪