馬會將AC米蘭「新保方」譯做基安盧基當拿隆馬相當繞口，日前佢拒絕同A米續約，即刻有個好易記嘅新綽號：Dollar隆馬。Dollar變成過街老鼠，被指貪錢要走人，周日U21歐國盃賽事期間仲被球迷掟錢諷刺。外界普遍認為罪魁禍首係佢背後嘅萬惡根源，經理人拉奧拿。不過拉奧拿喺周日接受訪問話佢哋先係受害者，因為隆馬同佢屋企人都受到恐嚇，先決定拒續約。

拉奧拿話：「呢件事已經滲入暴力同恐嚇成份，睇嚟唔走都難解決。我哋做咗一個唔想做嘅決定，隆馬原本已經決心同AC米蘭續約，但同佢屋企人都受到侮辱同恐嚇，絕對唔可以用呢種手法去留住球員，最壞嘅情況係，佢喺未來一季都唔可以參加比賽。我願意將責任攬晒上身，我亦可以同大家講，我一直都冇同任何大球會傾過隆馬轉會事宜。」

AC米蘭嘅行政總監法辛尼回應事件，強調從來冇恐嚇過隆馬，仲話只要隆馬改變主意，隨時歡迎同佢續約。