政府6月硬推送中惡法後，令香港經歷主權移交以來最嚴重嘅政治危機，但特首林鄭月娥至今拒絕答應巿民五大訴求，反修例示威持續，衝突程度亦越演越烈。民主黨超過60位黨員鑑於香港政府管治已完全失效，噚日發表公開信，要求三司十三局嘅管治團隊問責下台，其中曾任該黨副主席嘅「神童」羅致光就受重點招呼，信中點名要求佢同林鄭班子割席，辭任勞福局長帶頭明志，為當前緊急局勢寫下休止符，避免可預視嘅更多傷亡。

籲勿為暴政背書

有份呼籲神童局長辭職下台嘅白鴿黨員，包括前主席何俊仁同埋劉慧卿、現任副主席羅健熙、立法會議員林卓廷、許智峯，及現任區議員、社區主任等等。

白鴿黨話羅致光作為由民主派走入管治班子嘅一員，應該帶頭就政府送中條例引起嘅嚴重社會衝突向市民問責，辭職明志，重拾當年追逐公義及民主嘅初衷，勿為中聯辦同林鄭下嘅暴政背書，「我們呼籲羅致光先生帶頭辭職，與香港人站在同一陣線，嘗試為香港局面打開一線生機」。

對於一眾前黨友嘅誠懇呼籲，八方問過勞福局，神童局長有何回應？發言人回覆話：「勞工及福利局局長知悉有關信件，他不會公開評論。」似乎同示威者一樣堅持不割席。

李八方