虎父無犬子，尤其係做過飛虎隊嘅警隊一哥鄧竟成，佢個仔鄧智兆果然似足老竇，今年4月入咗警察學院接受督察訓練，年底畢業。一哥噚日同傳媒茶敍時話，兆仔遞表前，做老竇嘅就已經一早捉佢坐低傾偈，話佢知揀呢條路，可能面對乜嘢情況同壓力，頂得順先好交表。
一哥話兆仔諗清楚所有情況之後，認為冇問題先考督察。一哥愛子心切，佢話希望大家日後唔好不必要咁將佢兩父子放埋一齊，因為咁會對兆仔唔公道。一哥噚日同成班警隊高層見傳媒，仲問一班行家點睇呢個安排，其實警官以乜嘢形式見記者唔緊要，最重要係答問題時唔好耍官腔，否則相見不如不見。