【新增動新聞】
近年不少人愛上極限運動，惟每次有片段瘋傳，都引起網民激辯人身安全問題。多名行山友報稱，昨日（15日）下午目擊一名赤裸上身的男子，在獅子山頂崖邊，挑戰名為走繩（slacklining）的極限運動；在一條疑釘在兩邊懸崖的紅色繩索上來回走動，其間一度失平衡，從繩索上墮下，幸他及時抓住吊繩，本身亦繫上安全帶，未有受傷，聲稱在做「物理實驗」。有普通話女遊客見狀，驚呼「噢！嚇死了」，女片主坦言「在旁的人都在議論，條安全帶係咪穩陣？個個睇到好緊張」。

半裸男在懸崖的兩邊，疑以多口螺絲固定繩索，並展示寫上「請不要踫：物理實驗」的標語，更以繁體中文、簡體中文和英文一併顯示。他的踩吊繩片段被上載至facebook群組「香港行山遠足之友（吹水山谷）」後，旋即掀起不少網民熱議。有網民批評半裸男「死咗都唔值得可憐，辛苦消防員」，片主Loretta Lau亦質疑半裸男「做乜要咁樣做物理實驗？旁邊有個小學生，係咁問佢爸爸『點解？點解？』」

不過，隨即有部分網民留言，不滿其他人大驚小怪，「人哋做晒安全措施，有晒安全繩，死乜嘢啫？唔欣賞人哋膽量唔緊要，但吓吓一句『辛苦消防員』，而家辛苦咗人哋未？消防員唔係做義工」、「有安全帶又話唔知安唔安全」、「坐的士，條安全帶都可能唔安全，以後唔好坐喇」。亦有網民欣賞半裸男的勇氣，「佢玩咗成個晏晝，做足安全措施，膽色過人」。

攀石專家鍾建民指，走繩不只是一門自我挑戰的極限運動，有攀石愛好者也會藉走繩，鍛鍊平衡力，「好多地方都有人玩」，例如美國加州；由公園等戶外場地，以至家中，都可架設繩索，香港近2年才興起。據他了解，外國甚至有玩家不佩帶安全帶，香港則多數做足安全措施，「最緊要唔好妨礙他人，同危及自身安全；例如喺中環高樓大廈上面玩，下面嘅途人就會好擔心」。

鍾又指，難以評論片中的玩家是否恰當，但認為任何玩家都要「好小心」，因個人身體狀況、熟練程度，以至裝備的可靠度，皆可左右其安全；「嗰啲『爆炸螺絲』，打落嚿石度，究竟係即刻打，定係前人打落嘅呢？如果啲螺絲已經打咗超過1年，啲雨水滲咗入螺絲同嚿石之間嘅虛位，啲螺絲就會冇咁穩固，可能會fail（鬆脫）」。

另外，有網民批評半裸男，以多口螺絲固定繩索在岩石上，「鑽爛咗嚿石！」獅子山頂位於郊野公園範圍內，根據《郊野公園及特別地區規例》，巿民若挖出、開墾或擾亂郊園內的土壤，最高可罰款2,000元及監禁3個月。警察公共關係科回覆《蘋果》查詢時指，暫未接獲相關報案紀錄。

網民點睇

Cherry Loong：神經病！有事又要叫警察或消防，點解要挑戰生命？
司徒：實驗？其實係咪純粹想出吓風頭、吸吓睛咋？
Jsl Lee：佢唔寫做實驗，一陣啲人多手，搞吓個固定點，佢咪死得！
Ko Yan Chun：並非做甚麼實驗，只是在玩slacklining（走繩），寫「做實驗」只是嚇退見識較少之士