超強颱風「山竹」令到9月16號嘅沙田日馬賽事取消，唔少馬匹部署因而有所更改，但呢個令到香港亂晒大籠嘅「山竹」，分分鐘令到一個弱勢騎師有機會打破悶局。

第九場三班1200米，練馬師蘇偉賢隻「團結精神」上季喺四班取得1冠2亞，原本喺9月16日配上史卓豐上陣，多得「山竹」搞搞震，無法爭功，騎練喺賽事取消後，好快已達成共識，決定改喺明日（10月1日）出擊。

蘇、史二人有所決定後，騎者先知苗廐嘅「多多醒」亦同樣喺呢場出賽，「多多醒」9月2日馬季開鑼日，喺同程獲得殿軍，當時鞍上人正就係史卓豐。呢匹五歲馬經熱身後，今場跑入三甲，甚至贏埋，真係唔出奇。

不過豐豐應承騎「團結精神」在先，人在江湖，就要遵守合約精神，要焗住放手「多多醒」。

苗德禮就搵咗停賽復出嘅同鄉麥偉利幫手，有「南非張敬軒」之稱嘅麥偉利，成績不似預期，9月份成績只得2亞17負，反而同鄉利敬國已贏到5W，已經站穩陣腳，兩個南非年輕騎師比較之下，麥偉利自然失色。

「軒仔」亦坦白講自己好心急贏馬，今次突然獲得「多多醒」嘅帥權，佢喺上星期五（28日）操過呢匹馬，對狀態讚不絕口，唯一擔心排11檔起步，真係要考驗「軒仔」嘅應變能力同走位技巧。

如果「軒仔」真係憑「多多醒」贏馬開齋，就真係要多謝「山竹」令佢有意外收獲啦！