今日肥師奶推介

蘋果日報 2002/07/12 00:00


呍呢拿可口可樂 限量發售
可口可樂自上月開始,在美加地區新增了呍呢拿口味的可樂。香港都有舖頭入咗呢款新口味,不過頭一批只有五百支,喺聽日13/7(星期六)下午3時正式開賣,手快有手慢無。
呍呢拿味可樂同原味可樂差唔多,但多咗陣呍呢拿香味,不過呢種香味好得意,飲得太急會覺得好似淡味咗啲,要慢慢品嘗至啱,當然一定雪凍至飲啦。

$25/支(591毫升)
銷售點:韓國小食天地(2884 4559)
地址:旺角奶路臣街﹙女人街街口﹚
新鮮車前草煲水祛濕清熱
車前草並非可以作為蔬菜食用,但用佢作為清熱祛濕飲料則相當見效。
喺藥材舖就好容易搵到乾貨車前草,新鮮車前草則可以喺部份賣山草藥菜檔搵到,一般價錢都唔貴。
天時暑熱,流汗多咗,影響小便不暢、四肢無力、疲倦等,均可以用二至三両新鮮嘅車前草煲水代茶飲用,有利小便,鹹甜飲均可,加適量鹽,更有助止渴清熱,夏天我經常煲嚟畀啲仔女當水飲,有益又經濟。

$6-$8紮
部份山草藥菜檔

文:肥師奶