今期（25日）沙田編跑十場，兩泥八草地，用全闊Ａ跑道角逐，往績顯示有利前置守好位馬匹，兩場泥地都跑短途，天氣穩定跑正常泥地，通常利快放馬。蔡約翰重兵列陣，有信心可增添頭馬。蘇偉賢近期搏馬手風順，都可加以留意。

第六場四班1400米：蘇偉賢之「承你所願」前仗一出即勝田草1200米，上仗增程跑1400米，排不利大外檔，遇上一批有足夠路程經驗對手，難度相當高，結果跑番一席殿軍，其實表現已唔錯，亦上了寶貴一課。

有質馬復課勤操，保持良好進度，體形成長，收身線條靚到出汁，快跳越見淡定，今仗雷神莫雷拉唔放手，連續第三次騎，馬房出埋王牌報名出賽決心補中，應有截然不同演出。

同場「鑽飾傳奇」論狀態是全組最弗，試跑表現渾身是勁，力足介入爭勝。「常豐裕」上仗轉戰田草更有利發揮追勁，結果衝贏對手打開勝門，單薄馬微跌五磅相信影響不大，可繼續跟進。「駿馬翹楚」剛戰一放到底，姿態有餘未盡，升上四班絕對無問題，用麥偉利易發揮之馬，負輕磅跑法機動，可繼續爭入前列。

「大笑大少」新勝猶勇，用潘明輝可兼顧。「得德仔」增程有難度。「自動波」重養唔瘦好現象。「添好運」流鼻血後復出，試兩個大閘都唔曳，可拼則拼無保留。「藍天堡馬」、「仁愛之星」及「歡樂一生」近績及狀態均佳。