荷李活動作影星「The Rock」狄維莊遜（Dwayne Johnson）繼續喺香港為佢主演嘅新片《高凶浩劫》（Skyscraper）宣傳。

今日The Rock就連同劇中所有演員，包括莉芙甘寶 （Neve Campbell） 、一對童星挪亞哥特利（Noah Cottrell）、麥克納羅拔絲（McKenna Roberts）、台灣嘅昆凌、華裔演員文峰、新加坡演員黃經漢、導演羅遜馬素費巴（Rawson Marshall Thurber）同兩位編劇包費林（Beau Flynn）、海雲加西亞（Hiram Garcia）去到沙田新城市廣場出席Fans見面會，鄭裕玲（Do姐）就繼續擔任大會司儀。

活動開始前，市民已經迫爆商場，希望一睹The Rock及其他演員嘅風采，大會安排紅地毯畀演員同Fans作近距離接觸。第二次擔任電影宣傳活動司儀嘅Do姐就大讚The Rock相當親民，佢話：「我接觸過好多荷里活巨星，越高地位越冇架子，The Rock為人好Nice。」

同時嘟姐發現幾位主角包括The Rock，佢哋真人個頭型都比較細：「我個頭都唔算大，拍住佢影相睇落原來佢個頭比例好細。」仲講笑話對比起上次同奇異博士Benedict Cumberbatch見面，Benedict塊面比較長。

其後眾演員就現身喺紅地毯，著住淺紫色外套戴太陽眼鏡嘅The Rock一出現，立即引起全場哄動，佢相當親民主動走去兩旁同Fans簽名打招呼。又主動向記者表示好高興來到香港，大讚係一個美麗嘅城市。噚日佢喺社交網站上post出喺香港行街，仲穿梭後巷，問到佢對香港城市嘅感覺？佢話：「Amazing，香港街道充滿特色，好有趣。」

有冇趁機品嚐特色食物？The Rock話：「昨日我們去了『添好運』食了很多點心，還有其他特色食物。」從The Rock喺社交網站相片可見，佢噚日應該去咗荃灣區？佢話：「我去到每一個地方都不喜歡留在酒店，有機會就會出外四周走走。」咁今晚有咩節目？佢話：「好可惜今晚就要返美國，所以今天是在香港最後一日。」訪問完成後，佢仲拎起電話同在場記者影大合照。

另外，同樣有份演出嘅天王嫂昆凌，就覺得今次跟非常好嘅團隊合作，拍攝過程好開心。問到老公周杰倫對你嘅演出有咩評價？佢話：「他有看過，對我的評語也是好的。」昆凌又透露接下來要準備下一套關於賽車手嘅電影。

眾演員做完訪問後，就上台跟Do姐談談演出點滴及期望，然後大會更安排咗舞龍舞獅表演，並由The Rock親自替兩隻醒獅點睛。

活動結束之後，The Rock一行人就向住商場嘅戲院走去，大會亦安排咗特別通道入場，The Rock喺安排下去到放映緊佢主演嘅新片《高凶浩劫》嘅分院，留咗半個鐘之後就經後門離開，在場有幾十位Fans等候，不過今次The Rock走得好低調，好快就上咗喺外面等候嘅七人車，之後一共約七、八部七人車就直接駛往The Rock下榻嘅酒店後門，好快The Rock就上房休息。

精選娛聞，喺晒《娛果》
http://fb.com/appledailyent