還記得入行頭幾年，正值美國加息周期，由於工作性質關係，每次加息都要計計供樓人士每月供款嘅變化。當時香港剛走出沙士陰霾，仍在固本培元階段，股市縱然未炒起，樓市亦係靜蠅蠅，所以只以200萬樓作為計數指標。十年後嘅今日，上車盤價錢已經去到四字頭，窮人恩物五球都買唔到，想做窮人都難！

股市亦有異曲同工之妙，以往主板殼價講緊一兩億，創業板就幾千萬，時至今日，連創業板殼價都叫到三億，主板更加要五億，正正就係僧多粥少、供不應求嘅結果。以往三億市值樓下先會被標籤為細價股，而家？未夠十億都可以當殼股咁炒！事實勝於雄辯，好似老牌金飾股景福（280）咁，現價市值7.4億銀，但最新通告表示，有兩位新潛在投資者正洽購控股股東股權，爭崩頭格局也！戰友可能會話，景福由6月開始吹風賣盤，去到9月都仲係得個吹字，最後會唔會傾唔掂數爛尾。我認為答案係四個字︰吊高嚟賣！黃花閨女遇着兩戶好人家，作為未來外父外母，點都要計過度過，用現代術語講，有A餐同B餐揀，點解唔慢慢揀呢？

經過一輪賣資產及供股後，景福盤數已經執番靚仔，但而家竟然仲trade緊bookvalue樓下。睇番最新宣佈賣盤嘅順龍（361），市賬率講緊1.7倍，如果景福呢個價賣，名符其實賤賣資產！景福現價1.13元，只係比起第一次賣盤消息流出後高咗六格，要搵一隻平靚正殼嚟炒，其實唔難！