Legging係同女人作對產品，對腳粗啲真係唔好着，但為追上潮流，惟有繼續keepfit。班衰同事成日用朱古力引小妹，雖然食黑朱古力冇咁肥，但苦到死，冇晒食朱古力應有嘅樂趣。
不過最近識咗瑞士籍嘅Francesca，好鬼fit嘅佢，叫我食吓佢自家製嘅darkchocolate，一放入口只有好香嘅可可味，一啲都唔苦。Francesca解釋，其實黑朱古力只要用頂級可可豆做，就唔會有苦味，加咗香草rosemary，食完仲有回甘㖭。

Francesca用自己個名創立全人手製瑞士朱古力品牌，仲開朱古力班，內容好過癮，包括朱古力配酒、朱古力配香檳，連朱古力配邊種水都有，收費$200至$400。佢11月仲會同旅發局合作喺美酒佳餚年開班。
佢話，香港越嚟越多人識用紅白酒配搭唔同食物，但未必識配朱古力，呢樣喺歐洲尤其瑞士好普遍。佢話酒嘅甜度，要同朱古力嘅相若，否則啲酒飲落去會有酸味；淡味朱古力如白朱古力，配輕身清香嘅酒，如甜酒Moscatod'Asti或者VinSanto；烤焗杏仁朱古力，就最啱配香檳。
試朱古力同試酒一樣，由淡味白朱古力開始，最後到苦苦哋嘅黑朱古力。Francesca話，朱古力抗抑鬱，瑞士人平均每人每年食11.5公斤朱古力。想知多啲，可以去網頁
http://www.enrichyourpotential.com/。

電郵：mailto:[email protected]