當年今日
關於我們

【李八方online】譚志源兩會交功課 促推港青高鐵coupon

蘋果日報 2018/03/01 16:39

譚志源李八方大灣區

個個都想搞大灣區,唔通個個都想搞大灣區咩?阿嬌可能唔想,阿譚就肯定好想。政制局前局長譚志源(Raymond)離開熱廚房後一擊即中,當選新一屆港區人大代表,即將啟程北上兩會嘅Raymond作為新生都不容有失,呢次北上都會就住阿爺關心嘅議題「交功課」。
其中就住促進港青到內地交流同發展嘅建議中,最吸晴當然係趕上高鐵西九站通車熱,Raymond建議中央部委考慮推出「香港青年學生高鐵自由行優惠券」,為喺香港或內地讀大學嘅港青提供價錢相宜嘅高鐵優惠券,等佢哋可以喺暑假6至8月多次搭高鐵,寓旅遊於了解國家發展。
至於阿爺嘅baby大灣區,Raymond點會忽略?佢特別就住進一步發展大灣區內醫療產業提建議,關注香港註冊醫生喺區內嘅執業許可同稅務寬免,以及醫療機構嘅設立同運作等等問題。嗱,一月喺惠州舉行嘅首屆粵港澳大灣區衞生與健康合作大會,擔任新風天域集團嘅醫療副主席嘅Raymond都有出席,所以大灣區內嘅醫療發展,又點會唔係佢重點?