泛民立法會議員成日投訴街板、橫額被人刑事毀壞，警方次次都話會全力追查，但究竟警方有幾「全力」呢？唔係靠把口，係睇破案數字。警方噚日向立法會提交文件，交代追查呢類案件破案數字，2005年有26宗呢類報案，僅3宗破案；2006年跌到13宗，破到兩宗，到2007年升到有32宗，又係破到兩宗。睇個破案數字，唔理犯案數字升又好、跌又好，總之警方都只係破到兩、三宗案，警方有幾「全力」查案，八方唔敢評論，但泛民議員就相當唔滿意，事關警方破案率咁低，邊有阻嚇力，橫額、街板繼續俾人破壞，佢哋要不斷破財做新橫額、街板！