英格蘭依家喺世盃外出線在望，餘下兩場對斯洛文尼亞同埋立陶宛嘅分組賽只要攞多一分，就可以買機票去俄羅斯。領隊修夫基亦計劃到時畀啲WAGs隨隊去俄國，話要等班球員輕鬆吓，佢話:「我絕對鼓勵家人隨隊去俄羅斯，對於有啲球員嚟講佢地係超級重要。我想營造一個輕鬆嘅環境，等啲球員踢得舒服啲。」如果修夫基講過算，李斯特城前鋒占美華迪就可以帶埋老婆碧琪去俄國，希望佢到時唔好輕鬆得滯，落場腳軟啦！

但係修夫基咁做其實有風險，事關前英軍領隊艾歷臣喺2006年德國世界盃嗰時，曾經容許WAGs隨隊去德國。點知嗰班人去到德國就喪玩劈酒，當然就引嚟傳媒爭相採訪，最尾仲唔知係咪影響軍心，搞到英軍喺8強早早出局。