前晚吳國敬同女友Elaine出席婚紗公司晚宴，佢話希望老闆贊助畀折頭，問係咪會爬老友許志安頭？佢話唔知安仔幾時結婚，但就爆響口：「肯定爬唔到阿康（蘇永康）頭，阿康就好快啦。」記者話蘇永康冇講過結婚，阿敬即尷尬話：「講錯嘢㖭。」問蘇永康係咪今年結婚？阿敬話：「唔知呀，可能我收錯風，佢實鬧我，阿公（蘇永康）對唔住。」

馮仁昭噚日打電話問阿公，佢話：「吳國敬講嘢唔經大腦，已經好幾次，好似話BIG FOUR開騷唔預佢，唔知佢係咪撞邪，間中有撞邪言論，唔明點解自己結婚拉我落水，我冇結婚打算，我同女友都冇時間，女友係一個時裝牌子嘅亞洲領導人，佢呢個品牌每年四次時裝周，結婚唔係唔得，但要度期，我睇唔到今年度到期，但結婚一定係同呢個女人。」
阿公話前晚已喺電話鬧咗阿敬，對方猛講對唔住，問係咪嬲阿敬亂噏？佢話：「噚晚堅嬲，女友喺法國WhatsApp我，話朋友問佢有冇搞錯結婚唔出聲，我打電話鏟佢，但做兄弟冇隔夜仇，佢冇腦闖禍唔少，做得29年兄弟，如果嬲佢一早嬲咗，佢冇機心只係冇腦。」
撰文：馮仁昭