喺鬧市搵位泊車有幾難，香港車主最清楚，呢場緣份遊戲嚟到公眾假期更加係災難，前日勞動節，車主余先生喺西環就遇到婦人拖狗霸氣場面，結果車位被攔途截劫，前面仲有架富豪七人車突然倒駛十幾米嚟泊咗個位，白等兩分鐘，佢好唔服氣，事後將車cam片放上網，並留言「咁樣人肉+狗肉霸位都係第一次見！」引起網民熱議。

狗主懶理途人勸阻

余先生同《蘋果》講，當日中午揸住架Tesla去高街食brunch，當時沿西營盤第二街單程路直行，去到縉城峰外，右邊係一列露天咪錶位，佢話當時見到有架Mini Copper駛走，正打算駛入去之際，突然見到有個藍衫女人拖住隻貴婦狗由行人路走出馬路，跟住個女人就企喺車位度打電話，又揮手示意「已佔用」，原來佢係幫兩個車位前嘅一架富豪七人車霸位。有個外籍男子路過，好心提拖狗婦唔好阻住後面嘅車，但佢好少理，余生試過響號示意，個女人毫無反應，繼續一人一狗企喺馬路人肉霸位。呢個時候，兩個車位前有架富豪七人車突然倒車駛嚟，一嘢泊入去拖狗婦霸嘅車位。
眼利嘅佢話，當時發現富豪七人車後面架寶馬剛剛駛走，變相有兩個吉位任佢泊，佢話「反正前面個位仲好，我又好肚餓，唔想浪費自己時間」就駛前泊車。佢話事後諗番都覺得好好笑，「佢（拖狗婦）咁辛苦又要咁肉酸搶個位，然後個靚位本身喺佢後面」。
其實泊位短缺問題一直存在，現時本港有逾60萬架私家車，但泊位就只有約66.2萬個，每架私家車平均需要一個或以上嘅泊位，所以問題就持續惡化啦。