無綫前藝人寧進（原名梁志昌）曾經係陳志雲愛將，當年同鄧健泓、王喜等被封迷雲黨成員，寧進2010年曾捲入陳志雲嗰單涉貪案，事後寧進無事，案件糾纏多年，陳志雲舊年被判罪成，但免入獄，判罰款8.4萬元，陳志雲決定再上訴，今年6月獲終審法院批出上訴許可，案件將於出年2月21日審理。至於寧進喺事件後，佢索性退出幕前，轉職做地產，呢幾年發展唔錯，原來3年前仲低調結婚，上周四中秋佳節仲做埋老竇，生咗囡囡。

上月底啱啱35歲嘅寧進日前喺facebook報喜，貼咗一家三口喺醫院影嘅相，公佈小公主出世，鬼馬爸爸留言：「中秋出世的嫦娥！」《蘋果》今日WhatsApp恭喜寧進，佢好開心話：「多謝呀，囡囡係開刀生，佢重6磅8，中文名仲未改，英文名叫Jovi。」寧進抱住愛女，一臉滿足，囡囡眼仔碌碌，輪廓分明，生得同媽咪餅印一樣。問到寧進幾時結婚？佢話：「結咗3年，太太JoJo係我中一同學，初戀情人，後來畢業撞番。」仲會唔會追多個仔湊成好字，佢話：「隨緣，無plan定。」

寧進話同陳志雲一直有聯絡，但陳志雲呢排忙住綵排舞台劇，但佢都知寧進升呢做咗老竇，遲啲就去探BB，寧進話：「我哋買晒舞台劇飛，全家去捧場。」寧進轉行後開過電單車行，但因為生意唔好，蝕錢離場，佢去咗中原做地產，短短幾年晉升到分店經理，佢話：「冇諗過會殺出一條血路，做藝人收入唔穩定，o依多咗囡囡負擔大，我要努力賺奶粉錢。」