自從巴士藏針事件，小記呢排搭巴士，時刻都要打醒十二分精神，但冇針都唔一定可以安心坐足全程，好似讀者阿莊咁，周日晚(2日)搭27號線九巴嗰陣，就突然遇到巴士冒煙，嚇到走都走唔切，真係巧驚驚呀！

話說夜晚7點左右，阿莊喺旺角上咗架27號線九巴返順天邨，大約7點45分，仲有幾個站就到總站，但去到順利邨，突然有乘客大叫「嘩！好多煙呀！」打緊機嘅阿莊抬頭發現，車廂內滿佈濃煙，「都幾驚架，唔知會唔會著火！」由於阿莊坐咗喺上層中間位置，唔可以馬上衝落車，但喺排隊落車時，乘客一度爭先恐後，「有人大叫『唔好急，定啲黎』」，最終乘客都安全落晒車，阿莊話，「我係最後幾個落車，個心係咁跳！」佢仲話，呢架車平時都爆晒，就算即將到總站，車上都仲有3、40 人，如果人再多，爭落車時就真係好危險喇！

九巴回覆指，該架27號線巴士，原定往順天方向行駛，當駛到順利邨利恆樓對開，車長發現巴士因機件故障冒煙，逐於利恆樓站讓所有乘客下車，再安排他們轉乘另一架巴士，過程順暢，無人受傷，而涉事九巴亦已返回車廠檢查。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568