【12月韓劇】友姐催淚小品最吸引 退伍李昇基孖車勝元鬥演技
韓劇
2017年過埋呢個月就完結,今年大家睇咗幾多齣韓劇?又有幾齣韓劇令劇迷一煲再煲?如果過去11個月都錯過咗唔少優秀韓劇嘅劇迷,咁嚟緊12月仲有大把韓劇等住大家過睇。
(一)KBS《Jugglers》(首播日期:12月4日)
前年當兵嘅崔丹尼爾退伍後首部作品,講述崔丹尼爾飾演嘅冷漠上司同只識順從嘅助手白珍熙之間嘅故事,兩人由相遇到發展出感情嘅故事。
(二)MBC《不是機器人啊》(首播日期:12月6日)
劇集以機械人為題材,講男主角俞承豪因為對人類有過敏,所以從未拍拖,有一天佢突然間愛上一個機械人。而女主角蔡秀彬假扮機械人來換取工作機會。原本劇集於上月播出,不過因為MBC大罷工關係才延至今個月先播。
(三)KBS《黑騎士》(首播日期:12月6日)
去年拍完《Doctors》後,金來沅今次再孖申世京演出新劇《黑騎士》,講述為咗心愛嘅女人而甘心奉獻性命嘅純情男,申世京飾演從未出國,但要照顧家人以及同父異母嘅未婚妹妹,因為生活而成日四處奔波。
(四)tvN《世上最美麗的離別》(首播日期:12月9日)
tvN繼《Dear My Friends》後另一感人作品,劇集由《Dear My Friends》編劇盧熙京打造,劇集改編自盧熙京同名小說作品,講述一位平凡媽媽喺人生最後嘅日子,同家人重歸於好嘅故事。題材事實係盧熙京紀念佢因為癌症逝世嘅母親而寫下嘅故事,盧媽媽喺發現患癌前,經常被家呼喝,亦冇人理會過佢感受,直到有一日盧媽媽宣佈患癌消息後,就如炸彈一樣震撼家人嘅心靈,家人亦因而珍惜與盧媽媽共處嘅最後三個月。《世上最美麗的離別》曾於1996年拍攝劇集,今年再翻拍,並邀得元美京飾演患癌媽媽一角,崔智友、珉豪飾演元美京嘅仔女,劇集只會播出四集。
(五)JTBC《只是相愛的關係》(首播日期:12月11日)
由2PM成員俊昊孖元真雅主演嘅新劇《只是相愛的關係》,講述即使面對困境亦都會堅持到尾嘅主角,俊昊喺劇中飾演從小嘅夢想就係做足球員,點知因為老竇離世,加上身體受傷,令佢足球員之夢夢碎,但直到遇到女主角後先令佢生活慢慢改變。
(六)OCN《壞傢伙們:惡的都市》(首播日期:12月16日)
大前年由朴海鎮、馬東錫主演嘅《壞傢伙們》大受好評,所以OCN再推出續集,雖然唔係原班人馬做返續集,但同樣受到劇迷關注。今次《壞傢伙們:惡的都市》由朱鎮模、朴重勳、金志洙等出演,講述朱鎮模金盆洗手開餐廳做老闆,並獲朴重勳飾演嘅檢察官力邀一齊合力對抗壞人嘅故事。而此劇仲係朴重勳事隔24年後再重返公仔箱嘅作品,受到韓國劇迷關注。
(六)tvN《和遊記》(首播日期:12月23日)
tvN壓軸劇集《和遊記》,單睇陣容已經十分吸引,先有曾編寫《大話妹》、《最佳愛情》、《主君的太陽》等人氣韓劇嘅人氣編劇洪氏姊妹(洪貞恩、洪美蘭)執筆,演出陣容包括李昇基、車勝元、吳漣序、李洪基等。劇集以中國名著《西遊記》為背景,重新改編成現代奇幻故事,吳漣序飾演嘅女版唐僧,專門低價收購凶宅、廢舊老宅、風水極差嘅店鋪,之後再高價轉賣,集美貌跟財力於一身嘅地產公司代表。劇中佢跟曾有過孽緣嘅孫悟空(李昇基飾)及牛魔王(車勝元飾)重逢後,將展開一段奇妙嘅三角關係。
更多韓流,喺晒《娛果》
http://fb.com/appledailyent
JTBC《只是相愛的關係》 首播日期:12月11日
OCN《壞傢伙們:惡的都市》首播日期:12月16日