今周日（17日）晨課，因為撞正本季最後空檔周，所以大圈跳馬唔多，不過徐雨石馬房也有開工，另外新晉大師傅黃皓楠表現最為積極，替師傅徐雨石的多駒進行拍跳考驗。

其中，黃皓楠策「帝勝之星」跟「財寶家駒」拍跳兩段，前駒貼欄主動帶放，《蘋果》晨操專家積奇認為馬身喼得靚，直路保持好走勢，狀態持續見好；另外，他指出「財寶家駒」後檔追趕拍上，身靚且乾爽無汗，精神奕奕，過步有力，仍有爭勝水準。

「帝勝之星」今季稍為欠運，九次在四班1400米出戰未失過獎金，卻未曾贏過馬，今日父親節都特意快課一跳，似乎幕後心急開齋。