公子C喺USC（南加州大學）畢業，唔去台灣加入家族生意，竟然返嚟香港闖蕩，「壹仔」創刊之時，請咗公子C做攝影師，公子C揸開篷黃色紳寶房車返工，去到清水灣為靚女明星C影相，影到C小姐非常sexy，人見人暈浪，包括C小姐在內，後來我哋先知道，C小姐係為公子C暈浪也。公子C影相夠大牌，一定要有助手擔遮（攝影遮，作反光之用）跟住，當年跟佢擔遮嘅兩位助手，今日已經成為週刊嘅明星級攝影師。

公子C後來唔做攝影，改以高爾夫球搵食（呢樣係留學USC嘅好處之一），現於電視台做高爾夫球評述員，威晒。佢唔止打波叻，攝影又醒，佢拍攝嘅高球相片，簡值係國際級水平。呢日喺張連偉、袁天凡記者招待會上，見到公子C，着住一件紅色球衣，非常搶眼，佢話：「老虎仔活士送畀我嘅。」都唔知講真定講假，件衫就一定不是凡品。公子C與張連偉相識多年，久唔久就同張連偉喺深圳高爾夫球會打友誼波，佢話張連偉打波好認真，玩一場社交波都好似打公開賽咁認真。今次張連偉得盈科保險贊助，參加美國名人賽，故此同埋袁天凡一齊見記者，揸住球棒畀記者影相。公子C話張連偉係世界排名一百六十一，能夠參加USMasters已經係一項榮譽，值得中國人高興。左丁山以為公子C會做埋張連偉繙譯，陪佢去美國參賽㖭，但公子C攞唔到記者證兼夾冇人贊助，惟有作罷。