有時米芝蓮餐廳嘅精緻國際佳餚，都未必夠一粒金黃色香噴噴嘅雞蛋仔，或者一杯濃郁芳香嘅熱奶茶咁吸引，呢啲陪住港人成長嘅地道街頭小食，好在仲冇隨住時代變遷而消失。查實宜家港人享受地道小食，未必只係為咗醫肚，同時都係享受緊那些年嘅美好歲月。

時代廣場舉辦嘅「香港飲食文化」展覽好啱港人口胃，佢哋邀請咗香港收藏家協會副主席張順光，借出60至80年代香港飲食文化嘅收藏品，諸如舊餐廳嘅火柴盒、月餅傳單、月餅會封套、茶樓菜單、照片等，都會一一展出。

展覽期間仲會請嚟傳統民間小食工藝師傅開設「街頭小食檔」，於不同日子即席製作雞蛋仔、龍鬚糖、糯米糍、麥芽糖餅、白糖糕、芝麻卷……等大家喺啖啖滋味，係咪諗起都流口水呢？展覽本月28日起至6月5日朝十晚十喺露天廣場舉行，街頭小食檔則喺本月30日至6月5日開檔。