中環在線:耀才寸郭Sir「老人家」賣肌肉 - 李華華

蘋果日報 2017/08/09 00:00


「大隻佬股評人」郭思治今年初由耀才(1428)過檔去民眾證券,佢搞嘅民眾財經台噚日開台,咁啱舊東家耀才喺同一日開股東會,被問到點睇呢個挑戰,耀才行政總裁許繹彬有啲唔客氣咁話,郭Sir係賣肌肉,相比之下,耀才財經台就係賣專業。
許繹彬強調,耀才係財經台始祖,幾位分析員同主播都有豐富經驗同財經知識,只要佢哋努力,就可以「三個臭皮匠,勝過一個諸葛亮」。佢又讚花香,指耀才財經台不斷革新,最近請來大台前主播林芷彤Rap住報收市,喺網上有超過3萬點擊率。
主席葉茂林又加多句,話郭Sir係老人家,自己個台就年輕化好多,郭Sir離開後,耀才團隊仲團結咗咁話。

李華華