市場競爭激烈,發展商推廣花招層出不窮。好似長實同新地長沙灣宇晴軒,第二期就快推出,用歐陸風格做賣點。長實特意為樓盤整咗個網頁,介紹物業資料同最新消息外,重有個「宇晴軒之法國名勝知多少?」網上遊戲,參加者回答幾條簡單問題,留低個人資料,就有機會贏得五十萬旅遊獎項。
獎品係四人六天法國巴黎藝術文化之旅,同埋一萬蚊現金消費,可以搭頭等機,同住巴黎五星級四季酒店,重有專人帶你暢遊凱旋門、羅浮宮等名勝,價值五十萬,名額只得一個。網址www.the-pacifica.com.hk。
發展商話,遲啲會有第二輪推廣,但一定要參加咗第一輪,先至合資格。為讓傳媒感受樓盤嘅歐洲風情,噚日搵嚟法國廚師,親自下廚,請老記食法國餐。
古仔、GiGi贈興
復活節就快來臨,又係各大商場租戶黃金檔期,作為大業主,梗要搞啲活動配合,信和率先披露,九個商場有活動。最矚目係大角嘴奧海城,場內會有個用三十萬塊「樂高積木」砌成十二呎高嘅「積木巨蛋」,重會請嚟藝人古天樂同梁詠琪,為「奧海城巨蛋夢樂園」主持開幕禮。
屯門市廣場,就有全港首個芝麻街魔法學堂,由資深魔術師,教一百個小朋友玩魔術。
信和又向內地自由行客招手,舉辦「復活節開心購物遊」,邀請內地金融、媒體同通訊等知名企業屬下員工參加,由廣州直達信和旗下商場,重安排埋普通話大使,帶領自由行客逛商場購物。消費滿指定金額,會有多項優惠,如退回交通費、送禮品、半價換手提電話。全日消費最多嘅,重可以獲贈數碼機㖭。