有一段時間冇喺香港露面嘅佘詩曼，原來佢去咗哈爾濱拍電影，雖然近排香港嘅天氣轉涼，不過同哈爾濱相比，就真係天淵之別喇，事關嗰邊嘅天氣每日徘迴喺零下11度至零下21度之間，阿佘話今次真係知道乜嘢叫寒到入心，好彩有備而來，成個行李喼都擺滿暖包，幾乎日日都有10幾個暖包跟身。

阿佘今次仲同影帝梁家輝首次合作，阿佘話：「真係好興奮，但係第一日開工，就即刻要同家輝哥拍感情戲，搞到我都有啲緊張。」除咗梁家輝之外，呢套戲仲係由日本著名電影《死亡筆記》嘅導演金子修介執導，阿佘笑住話：「雖然我哋語言不通，但有翻譯喺現場，導演都好積極同我哋溝通打破語言障礙。」

阿佘仲話佢今次喺電影要講俄羅斯語講對白，雖然佢本身識英語和德語，但係都考起：「第一次接觸俄羅斯語嘅對白，雖唔係全部對白都係，但係都覺得好新鮮，原來俄羅斯文真係好難學，怪不得係世界最難嘅語言之一。」

更多娛聞，喺晒《娛果》
http://fb.com/appledailyent