現年24歲日本女星有村架純憑NHK高收視晨早劇《雛鳥》成為國民女星，前日一名52歲男性上班族涉喺福岡偷有村架純嘅大型宣傳廣告被捕。

據警方透露該男子前晚8時許，喺AEON筑紫野店嘅化妝品店盜取牆上廣告框架嘅有村架純海報，因為店內今個月初都有同樣事件發生，所以加強保安，該男子準備落手時即被發現。

該男子自稱係有村架純粉絲，但同時又承認曾於其他店偷海報，並計劃將海報喺網上放售，據報道指海報市價即7萬日圓（近5千港元）。