陳智燊和太太宋熙年今日在尖沙嘴出席一個品牌開幕，他們在活動中玩鬥快執行李的遊戲，事後宋熙年指老公平時要花2日慢慢執拾行李，「佢好講究每件物品放喺邊，同埋包得乾唔乾淨。」她更爆老公有嚴重潔癖，「去完旅行，行李篋要喺屋企門口抹一次先可以拎入屋，然後打開逐件再抹，去完買餸又係，所有嘢都要抹一次先可以放入櫃，有時見佢咁辛苦，我想幫吓佢，但我越幫越忙，所以而家索性望住佢做。」

但陳智燊不會過份執着兒子的清潔度，「我明白小朋友係需要亂，所以老婆成日問『點解阿仔可以亂，我唔可以亂？』因為阿仔唔識。」宋熙年表示：「其實小朋友喺某程度上係要接觸吓日常嘅細菌，小朋友先會strong啲。」

對於陳智燊將以爸爸身份過首個父親節，宋熙年笑說：「驚喜就係冇慶祝，其實日日都係父親節，佢攬住個仔係最開心，可能到時一家大細食lunch，簡單啲，因為阿仔仲細，作息時間好定時，等佢大少少先。」陳智燊坦言在上月的母親節，意識到自己做了父母的感覺，「我臨時先book餐廳，禮物又要後補，鬧出好多笑話，因為以往唔會買禮物，又唔會慶祝，但今年就多咗個責任。」他更即場問太太：「我有冇禮物先？」宋熙年即答：「未有，你都未送，最好嘅禮物，就係我幫你生咗個咁可愛嘅囝囝，所以你冇禮物，但任何節日，你都要送禮物畀我。」陳智燊笑着回答：「OK，應該嘅！」

-----------------------------
【新聞有價】6月17日起 繼續撐蘋果
http://bit.ly/2IJ24ZR
--------------------------------
【記住63836568】全民爆相爆片！下一個爆料王就係你
https://bit.ly/2Guolu9